Leuenberger Konkordie

De Konkordie reformatorischa Kiachn in Eiropa, kuaz Leuenberger Konkordie, is dees Grindungsdokument vo da Gmoaschoft Evangelischa Kiachn in Eiropa, friaha Leuenberger Kiachengmoaschoft. Dees Dokument is noch zwischnkiachlichn Leagsprechn 1973 z Leuenberg (bei Basel) entstondn. De Konkordie hod de Kiachnspoitung zwischn de reformiatn und lutherischn Kiachn varringad und hod de Kiachngmoaschoft unta vuin evangelischn Kiachn z Eiropa wiedaheagstejt. De Kiachngmoaschoft nochm Vastendnis vo da Leuenberger Konkordie is sowoi a Kanzl- und a Obmdmoisgmoaschoft ois wia aa a Gmoaschoft in Zeignis und Deanst.

In da Leuenberger Konkordie ham de beteiligtn lutherischn, reformiatn, uniatn und vorreformatorischn Kiachn za oana grundseztlich gmoasamen Affossung vo da Tauf, vom Obmdmoi und Evangelium gfundn. De Vawerfungen vo da Reformation wean so afghom. De methodistischn Kiachn vo Eiropa san 1997 af da Grundlog vo oana "Gmoasamen Eaklearung zua Kiachngmoaschoft" beitretn. De Sejbststendige Evangelisch-Lutherische Kiachn is da Konkordie vo de reformatorischn Kiachn in Eiropa ned beitretn, wei in eanara Woarnehmung grod de lutherische Lea vom Heilign Obmdmoi afgebm worn is. Kritik is aa vo lutherischen Theologn innahoib vo de Landeskiachn kema, so vo de Dogmatika Ernst Sommerlath und Jörg Baur. Aa de moastn evangelischn Freikiachn wia de Adventistn, Baptistn und de in da Reformationszeit entstondanen Mennonitn, wo de Glaubmstauf praktizian, san ned beteiligt. Zwischn 2002 und 2004 ham owa mearare offizieje Konsultationen zwischn da Eiropejischn Baptistischn Feadarattion und da Gmoaschoft Evangelischa Kiachn in Eiropa stottgfundn. Entsprechende Konsultationen mit Mennonitn oda Adventistn ham ned stottgfundn.